ਸੁਰਜੀਤ ਗੱਗ

ਬਾਂਝ ਕਲਮਾਂ

 

ਨਹੀਂ
ਕਲਮਾਂ ਕਦੇ ਬਾਂਝ ਨਹੀਂ ਹੁੰਦੀਆਂ
ਪਰ ਕੁੱਝ ਕਲਮਾਂ
ਕਾਗਜ਼ਾਂ ਦਾ ਗਰਭਪਾਤ ਕਰਨ ਲਈ ਹੀ
ਭੋਗ ਕਰਦੀਆਂ ਨੇ
ਕਾਗਜ਼ਾਂ ਨਾਲ ਜ਼ਬਰਦਸਤੀ ਕਰਦੀਆਂ ਨੇ
ਤੇ ਜਨਮਦੀਆਂ ਨੇ
ਪੋਲੀਓ ਦੇ ਮਾਰੇ ਹੋਏ
ਅੱਖਰ
ਜੋ ਚੱਲਣ ਲੱਗੇ ਲੜਖੜਾਉਂਦੇ ਨੇ
ਤੇ ਪਾਠਕਾਂ ਨੂੰ ਬਣਾਉਂਦੇ ਨੇ
ਅਧਰੰਗ ਦੇ ਮਰੀਜ਼
ਇੱਕ ਸੰਤੁਲਿਤ ਵਾਤਾਵਰਨ ਸਿਰਜਣ ਤੋਂ
ਅਸਮਰੱਥ
ਇਨ੍ਹਾਂ ਫੰਡਰ ਕਲਮਾਂ ਦਾ
ਬਾਂਝ ਹੋ ਜਾਣਾ ਹੀ
ਸਮਾਜ ਦੇ ਹਿਤ ਵਿੱਚ ਹੈ
ਉੰਝ ਕਲਮਾਂ ਕਦੇ ਬਾਂਝ ਨਹੀਂ ਹੁੰਦੀਆਂ
ਪਰ ਇਨ੍ਹਾਂ ਦੀ ਕੁੱਖੋਂ
ਕਪੂਤ ਵੀ ਉੱਗ ਪੈਂਦੇ ਨੇ
ਤੇ ਬਦਕਾਰਾਂ ਵੀ
ਉੰਝ ਕਲਮਾਂ ਕਦੇ ਬਾਂਝ ਨਹੀਂ ਹੁੰਦੀਆਂ

ਸੁਰਜੀਤ ਗੱਗ